Verður forsetans minnst sem hetju eða skúrks?

Ég tel að nú sé forseti vor Herra Ólafur Ragnar Grímsson í miklum vanda og klóri sé ærlega í kollinum. Hvernig ætlar hann að klóra sig í gegnum þennan vanda. Hann á tvo kosti og hvorugan fýsilegan. Að skrifa undir ríkisábyrgðina á Icesave að ósk vina sinna og fyrrverandi samflokksmanna og endanlega rústa stórsködduðu mannorði sínu. Eða neita að skrifa undir og vísa þeim til þjóðarinnar. Semsagt leyfa kjósendum að velja hvort þeir sætti sig við að steypa sjálfum sér, börnum, og barnabörnum í skuldafen sem ekki sér fyrir endann á. Víst er að þá muni vinir hans og fyrrum samflokksmenn snúa við honum baki.

Ég ætla leyfa mér að spá því að forsetinn skrifi ekki undir þess ríkisábyrgð á Icesave. Fyrir því hef ég eftirfarandi rök. Þeir fyrirvarar í ábyrðinni sem hann notaði í sumar sem ástæðu undirskriftar sinnar þá, var ýtt útaf borðinu af Hollendingum og Bretum. Þeir eru því ekki lengur inní myndinni. Augsýnilegt er að í þessu máli er gjá milli vilja þings og þjóðar. Þegar þetta er skrifað hafa tæplega 57 þúsund einstaklingar hafa skorað á forsetann að neita undirskrift sinni. Það er um það bil einn sjötti þjóðarinnar. En bil milli þings og þjóðar var jú einmitt þau rök sem forsetinn notaði þegar hann hafnaði fjölmiðlalögunum svokölluðu, fyrir tæpum 5.árum. Ennfremur verður það að viðurkennast að forsetinn nýtur heldur lítils fylgis og stuðnings meðal þjóðarinnar eftir útrásarvíkingadekur sitt á undangengnum árum. Mannorð hans er semsagt stórskaddað og hleypi hann þessum ósóma í gegn mun hann endanlega gera útaf við æru sína í embætti forseta Íslands.

Völin og reyndar kvölin er forsetans. Hann á nú rúm 2.ár eftir á yfirstandandi kjörtímabili í embætti forseta Íslands og flest bendir til að hann láti af embætti eftir það. Hvernig sem fer mun ákvörðun hans lifa með þjóðinni langt eftir okkar dag. Sagan mun koma til með að dæma hann annaðhvort sem forsetann sem hafnaði fjölmiðlalögunum og leyfði þjóðinni að kjósa um Icesave. Eða sem skúrkinn sem brást þjóðinni og hrinti henni endanlega í skuldafen Icesave. Hvort ætli hann vilji láta minnast sín fyrir?

Áskorun afhent í fyrramálið

Athugasemdir

[Rúnar Þór Þórarinsson, 2.1.2010 kl. 07:16]

Rétt hjá þér. Og þetta snýst ekki bara um peningana - skuldafenið - heldur að láta ekki setja hryðjuverkalög og taka því þegjandi og hljóðalaust eins og þáverandi stjórnvöld gerðu. Yfirtaka þeirra á eignum bankanna í Bretlandi olli stórfelldu tapi þ.s. ekki er hægt að nálgast þær eignir til að greiða niður óráðsíu bankanna íslensku erlendis heldur á að hnýta henni á islenska þjóð.

Það er ekki nokkur leið að Ólafur undirriti lögin án þess að vísa þeim í þjóðaratkvæði.

Gallinn er að þá þarf stjórnin að fara frá og Sjálfstæðisflokkurinn og svo ég tali ekki um Framsókn hafa náð að þyrla upp svo miklu ryki að fyrrum stuðningsmenn þessara hrunflokka eru farnir að gleyma því hverjum þetta allt er að kenna. Raunveruleg hætta er á að þeir flokkar komist aftur að og skömmin að því að leyfa þeim fjanda að gerast er margfalt verri en að gangast við Icesave samningnum oft og mörgum sinnum.

[Valsól (IP-tala skráð) 2.1.2010 kl. 11:30]

Egill Helga gerði smá könnun og tók út hundrað nöfn og 19 þeirra reyndust einstaklingar fæddir á árunum 2004-2008. ,,Í þessum hópi er talsvert af unglingum sem vantar ekki mikið upp á að verða kjörgengir, en líka börn – þeir yngstu á listanum eru fæddir 2004, 2005, 2007 og tveir sem eru fæddir 2008, og strax komnir í tölvuna".

[Sigurður Eðvaldsson, 2.1.2010 kl. 17:10]

Rúnar Þór. Ég er sammála þér að öllu leyti, að einu undanskildu. Ég sé ekki fyrir mér hvers vegna ríkisstjórnin þurfi að fara frá þó svo að þjóðin felli ríkisábyrgðina í þjóðaratkvæðisgreiðslu. Umboð hennar gildir í rúm 3.ár til viðbótar alveg burt séð þó þjóðin neiti að undirgangast Icesave-ósómann. Það er að vísu engin fordæmi fyrir þeirri stöðu sem þá kemur upp. Því í eina skiptið hingað til sem forsetinn hefur vísað lagafrumvarpi til þjóðarinnar dró ríkisstjórnin það til baka þar sem hún gerði sér það ljóst að meginþorri þjóðarinnar var á móti því frumvarpi.

Valsól: Ég hef ekki séð þessa könnun sem Egill Helga gerði en mér finnst það málstaðnum ekki til framdráttar ef rétt reynist að verið sé að skrá börn á listann. Hitt er annað að ég tel að lögráðamenn þessara barna réttláta áreiðanlega gjörðir sínar á þann hátt að þessi börn muni koma með að bera Icesave-byrgðarnar þegar þau vaxa úr grasi. Varðandi unglinga finnst mér gilda dálítið annað. Mér finnst það í góðu lagi að þeir skrái sig á listann þó að þeir séu ekki lögráða og með kosningarétt. Að því gefnu að unglingurinn sé búinn að kynna sér málið og taki upplýsta ákvörðun sjálfur. Á mínu heimili búa tveir unglingar sem tóku sjálfir upplýsta ákvörðun um að skora á forsetann þar sem þau meta stöðuna svo að verði ríkisábyrgðin samþykkt í óbreyttri mynd muni það rýra lífskjör þeirra í komandi framtíð.